सायर अजे घरे कोनी आई।रात खासा पड़गी ही।घरे फिकर हुवणो वाजबी हो।आडोस पाड़ोस में निगै दास्ती करी।उणरी साथनिया ने बुझा ताझो करयो पन् कीं पतो नई लागो जद सायर रो बापू कॉलेज गियों।चौकीदार टालो जड दीनो हो।बो बतायो के सायर कालेज रा एक टाबर गणेश रे साथे मोटो थैलों लियोड़ी रेल रे ठेसन माथे जावती देखी ही।बो गणेश रे घरे गियों तो गणेश रो बाप बोलयो गणेश तो आबू जावन रो केयर गियों हो।अबे पक्को वैम हुयगो के सायर गणेश रे साथे गी परी।आवतो थाना में रपोट लिखायर घरा आयगो।
घर मे कूका रोलो मचगो।सगळी बॉस गुवाड़ी में एक इज बात के सायर भाजगी।धणी लुगाई भूखा तिरसा रोवता रात काटी।अबे दिनरी उगाळी जना जना चासा लेनने आवे।जीवन्ता मारया समान हुगा।कालो मुंडों हूगो।अबे मौत तो आवे नई अर जीवन मे की भद्रक नई।

दिनुगे सायर रो बाप थाणे गियों।सायर रो फोटू ई दीयो।पुलिस आला धीजो बढ़ायो।
आगले दिन सायर रो फोटू अखबार में छ्प्यो।लोग रस ले लेर पढ़े हा।घराला रो तो मरण हूगो।रोवन सिवाय कोई काम नई हो।आँख्या रा आंसू ई सूखगा।अधगावला पड्या हा।दो दिन सु रोटी रो टुकड़ो ई मुंडा में नई गियों हो।
सिंझ्या रा सरकारी टीवी माथे गणेश अर सायर री फोटवा दिखाईजी ही।
आबू रा होटल आलो फोटवा देखी अर जिमनियाँ माथे निजर नाखी तो दोनुई जिमे हा।होटल आलो थाना आला ने फोन करर बुलाय लीना।दोनु अजे चलू करयोई हो अर गणेश पीसा देन ने होटल मालक खने पुगो तो होटल मालक थोड़ा बाता में बिलमाय लीना।बै बाता करे हार पुलिस आयगी।दोना ने घाल गाड़ी में अर थाणे लेगा।चोर रा पग तो काचा ई हुवे है।दोनयु हाकर ग्या।

थाना आला दिनुगे।ऊना ने उणरे थाणे लेयग्या।
थाना आला दोनया रा घराला ने बुलाया।गणेश रे घरआला तो कोनी आया पन सायर रा मा बाप दोनयूई आया हा।तीन दीना में मरतगाले हुयोडा हा। बेटी सायर आपरे मा बाप ने ओलखन सुई नटगी।अबे थानेदार बोलयो जद आ थाने ओलखे ई कोनी तो थारे घरे जावो।
थाना में दोय न्यारी न्यारी हवालात में न्यारा न्यारा छोरी छोरा ने घालर आडो ढक दीनो।
सायर री मा एक कागद काढर थानेदार ने थमायो।बीरा फगत ओ कागद म्हारी सायर ने एकर पढाय दीजो।पछै साँवरो करसी जिको मंजूर।
थानेदार पैली सायर रे मा बाप ने पानी पायो अर पैली खुद कागद खोलर पढ़न लागो।कागद पढ़न सु पैली दोन्या ने थानारी बैंच माथे बिठाण्या।
कागद इन भांत हो।
मा रो कागद बेटी रे नांव।
बेटी सायर।थूं सोरी सुखी रेवे।म्हारी आसीस है।बेटी। थारो कसूर कोनी म्हारा लारलै जलम रा की खोटा करयोडा हा जिका रो कसूर है।आज च्यार दिन सु थारो बाप रोटी रो एक टुकड़ो पेट मे कोनी उतरयो।एक समीचर भले है।थारे गिया पछै थारी बडोडी बैन री सगाइआलो नारेल सगा पाछो बग़ायर काल ई गिया है।क्यू बगायो ओ थू सोच लीजे।
थू जलमी जद डागदर कह्यो हो के छोरी जलमणी दौरी है।मर सके है।म्हे पेट चिरायर थाने जलम दियो हो।अजे चिरिजयोडो पेट सफा सामी है।म्हाने बचावण सारू थारो बाप अर काको खून दियो हो।थूं तबरपने घनोई दुख दियो।थाने निमोनियो हुयो।म्हे धणी लुगाई रातर दिन घणाई फोड़ा भोग्या।थू जद पढ़ती ही थाने निकालो निकलयो तीन मइना घणाई वेळा बितया।सगळी बाता थाने चेते हुसी।थारी स्कूटी सारू म्हारो माथा रो बोरियों जिको म्हारो सुवाग भाग हो बेच्यो।थाने मोबाइल दिरावन सारू म्हारी बीटी बेचर आंगली सुनी करी ही।म्हारी सत्रह साल री पाल पोस में इसी किसी खामी तने लागी के कोई परायो सतरा दिन में पूरी कर दी।

सगळी बाता नई लिखर इत्तोई केवणी चावूं।मा बाप जोइजे तो घर खुल्लो है।मैं अबे थाना कचैड़ी थारे सारू नई आवुली।
थानेदार री आँख्या डबडबिजगी।थानेदार ई तो मिनख हुवे है।
धणी लुगाई घरा आयगा।
घरा आयर टूटोड़ी मचली ढाली।धणी ने पाणी पायो अर बा खुद पाणी पियोर बोली थाने रोटी जिमया आज चौथो दिन हुयो है।म्हे रोटी ल्यावू थे ज़िमलयो।
बा एक थाली में एक सोगरो अर कादो ले आई।बो बोल्यो की तू ई जिमले।बा ई एक सोगरोर कादो ले आई।दोन्यूं हवाले हवले दो च्यार घूँट पाणी पियोर हिचकी आयगी।सायर री मा बोली लागे सायर चितारै।
अबकाले सायर रे बाप रे मुंडे मुल्क आई अर बोल्यो।थू गैली हुगी।बा नई चितारै।चितारन जोगी ई हुवती तो जावती ई क्यूँ।
थानेदार सायर ने कागद देय दिनो।
सायर पुरो कागद पढयोर पछै आखी रात रोवती रोवती काढ़ी।
दिन उगो।अदालत दिनुगे खुली।गणेश अर सायर ने अदालत लेयर गिया।अदालत में गणेश रे घर सु कोई कोनी आयो।उनने जेल भेज दियो।सायर बोली म्हाने म्हारे घरे भेजो।अदालत थानेदार ने कह्यो इनने इणरे घरे पुगाय द्यो।
थाना री गाड़ी सायर रे घरे गी।सायर घर मे बड़ी अर भू भू रोवन लागगी।मा बाप ई रोवे हा।सायर रोवती जावे ही अर पिस्तावो करे ही।छेकड़ सायर आपरे घरा आयगी।बीजे खानी गणेश रो बाप थाणे कचैड़ी कठैई नई गियों,नई वकील ई करयो।लोग बुझयो तो बोलयो इसे कपूत री पैरवी क्यों करूँ जिको किनीरी इज्जत माथे कलंक लगायो अर म्हारे ई खानदान माथे कालून्स लगाय दियो।किणी री पैरवी नई करयां गणेश ने सजा बोलिजगी।केई दिन तो बाता चाली पछै भूले पड़गी।नवी बात नो दिन तानी तुणी तेरा दिन।कहानी

माँ रो कागद

– देवकिशन राजपुरोहित
सायर अजे घरे कोनी आई।रात खासा पड़गी ही।घरे फिकर हुवणो वाजबी हो।आडोस पाड़ोस में निगै दास्ती करी।उणरी साथनिया ने बुझा ताझो करयो पन् कीं पतो नई लागो जद सायर रो बापू कॉलेज गियों।चौकीदार टालो जड दीनो हो।बो बतायो के सायर कालेज रा एक टाबर गणेश रे साथे मोटो थैलों लियोड़ी रेल रे ठेसन माथे जावती देखी ही।बो गणेश रे घरे गियों तो गणेश रो बाप बोलयो गणेश तो आबू जावन रो केयर गियों हो।अबे पक्को वैम हुयगो के सायर गणेश रे साथे गी परी।आवतो थाना में रपोट लिखायर घरा आयगो।
घर मे कूका रोलो मचगो।सगळी बॉस गुवाड़ी में एक इज बात के सायर भाजगी।धणी लुगाई भूखा तिरसा रोवता रात काटी।अबे दिनरी उगाळी जना जना चासा लेनने आवे।जीवन्ता मारया समान हुगा।कालो मुंडों हूगो।अबे मौत तो आवे नई अर जीवन मे की भद्रक नई।
दिनुगे सायर रो बाप थाणे गियों।सायर रो फोटू ई दीयो।पुलिस आला धीजो बढ़ायो।
आगले दिन सायर रो फोटू अखबार में छ्प्यो।लोग रस ले लेर पढ़े हा।घराला रो तो मरण हूगो।रोवन सिवाय कोई काम नई हो।आँख्या रा आंसू ई सूखगा।अधगावला पड्या हा।दो दिन सु रोटी रो टुकड़ो ई मुंडा में नई गियों हो।
सिंझ्या रा सरकारी टीवी माथे गणेश अर सायर री फोटवा दिखाईजी ही।
आबू रा होटल आलो फोटवा देखी अर जिमनियाँ माथे निजर नाखी तो दोनुई जिमे हा।होटल आलो थाना आला ने फोन करर बुलाय लीना।दोनु अजे चलू करयोई हो अर गणेश पीसा देन ने होटल मालक खने पुगो तो होटल मालक थोड़ा बाता में बिलमाय लीना।बै बाता करे हार पुलिस आयगी।दोना ने घाल गाड़ी में अर थाणे लेगा।चोर रा पग तो काचा ई हुवे है।दोनयु हाकर ग्या।
थाना आला दिनुगे।ऊना ने उणरे थाणे लेयग्या।
थाना आला दोनया रा घराला ने बुलाया।गणेश रे घरआला तो कोनी आया पन सायर रा मा बाप दोनयूई आया हा।तीन दीना में मरतगाले हुयोडा हा। बेटी सायर आपरे मा बाप ने ओलखन सुई नटगी।अबे थानेदार बोलयो जद आ थाने ओलखे ई कोनी तो थारे घरे जावो।
थाना में दोय न्यारी न्यारी हवालात में न्यारा न्यारा छोरी छोरा ने घालर आडो ढक दीनो।
सायर री मा एक कागद काढर थानेदार ने थमायो।बीरा फगत ओ कागद म्हारी सायर ने एकर पढाय दीजो।पछै साँवरो करसी जिको मंजूर।
थानेदार पैली सायर रे मा बाप ने पानी पायो अर पैली खुद कागद खोलर पढ़न लागो।कागद पढ़न सु पैली दोन्या ने थानारी बैंच माथे बिठाण्या।
कागद इन भांत हो।
मा रो कागद बेटी रे नांव।
बेटी सायर।थूं सोरी सुखी रेवे।म्हारी आसीस है।बेटी। थारो कसूर कोनी म्हारा लारलै जलम रा की खोटा करयोडा हा जिका रो कसूर है।आज च्यार दिन सु थारो बाप रोटी रो एक टुकड़ो पेट मे कोनी उतरयो।एक समीचर भले है।थारे गिया पछै थारी बडोडी बैन री सगाइआलो नारेल सगा पाछो बग़ायर काल ई गिया है।क्यू बगायो ओ थू सोच लीजे।
थू जलमी जद डागदर कह्यो हो के छोरी जलमणी दौरी है।मर सके है।म्हे पेट चिरायर थाने जलम दियो हो।अजे चिरिजयोडो पेट सफा सामी है।म्हाने बचावण सारू थारो बाप अर काको खून दियो हो।थूं तबरपने घनोई दुख दियो।थाने निमोनियो हुयो।म्हे धणी लुगाई रातर दिन घणाई फोड़ा भोग्या।थू जद पढ़ती ही थाने निकालो निकलयो तीन मइना घणाई वेळा बितया।सगळी बाता थाने चेते हुसी।थारी स्कूटी सारू म्हारो माथा रो बोरियों जिको म्हारो सुवाग भाग हो बेच्यो।थाने मोबाइल दिरावन सारू म्हारी बीटी बेचर आंगली सुनी करी ही।म्हारी सत्रह साल री पाल पोस में इसी किसी खामी तने लागी के कोई परायो सतरा दिन में पूरी कर दी।
सगळी बाता नई लिखर इत्तोई केवणी चावूं।मा बाप जोइजे तो घर खुल्लो है।मैं अबे थाना कचैड़ी थारे सारू नई आवुली।
थानेदार री आँख्या डबडबिजगी।थानेदार ई तो मिनख हुवे है।
धणी लुगाई घरा आयगा।
घरा आयर टूटोड़ी मचली ढाली।धणी ने पाणी पायो अर बा खुद पाणी पियोर बोली थाने रोटी जिमया आज चौथो दिन हुयो है।म्हे रोटी ल्यावू थे ज़िमलयो।
बा एक थाली में एक सोगरो अर कादो ले आई।बो बोल्यो की तू ई जिमले।बा ई एक सोगरोर कादो ले आई।दोन्यूं हवाले हवले दो च्यार घूँट पाणी पियोर हिचकी आयगी।सायर री मा बोली लागे सायर चितारै।
अबकाले सायर रे बाप रे मुंडे मुल्क आई अर बोल्यो।थू गैली हुगी।बा नई चितारै।चितारन जोगी ई हुवती तो जावती ई क्यूँ।
थानेदार सायर ने कागद देय दिनो।
सायर पुरो कागद पढयोर पछै आखी रात रोवती रोवती काढ़ी।
दिन उगो।अदालत दिनुगे खुली।गणेश अर सायर ने अदालत लेयर गिया।अदालत में गणेश रे घर सु कोई कोनी आयो।उनने जेल भेज दियो।सायर बोली म्हाने म्हारे घरे भेजो।अदालत थानेदार ने कह्यो इनने इणरे घरे पुगाय द्यो।
थाना री गाड़ी सायर रे घरे गी।सायर घर मे बड़ी अर भू भू रोवन लागगी।मा बाप ई रोवे हा।सायर रोवती जावे ही अर पिस्तावो करे ही।छेकड़ सायर आपरे घरा आयगी।बीजे खानी गणेश रो बाप थाणे कचैड़ी कठैई नई गियों,नई वकील ई करयो।लोग बुझयो तो बोलयो इसे कपूत री पैरवी क्यों करूँ जिको किनीरी इज्जत माथे कलंक लगायो अर म्हारे ई खानदान माथे कालून्स लगाय दियो।किणी री पैरवी नई करयां गणेश ने सजा बोलिजगी।केई दिन तो बाता चाली पछै भूले पड़गी।नवी बात नो दिन तानी तुणी तेरा दिन।